Авлигатай тэмцэх газраас Хөгжлийн банкны асуудлаар мэдээлэл хийлээ.
Тус банкнаас 52 зээлдэгчийг шалгуулахаар АТГ-т хандсан байна. Хэргийн шалгаж эхэлснээс хойш 8.5 тэрбум төгрөгийн зээл эргэн төлөгджээ.
Мөн шалгалтын явцад хуулийн дагуу захиран зарцуулах эрхэд хязгаарлалт тавьсан байна. Тухайлбал,
- Үл хөдлөх хөрөнгө 186,
- Тээврийн хэрэгсэл 124,
- Үйлдвэрийн барилга 1,
- Лиценз 1,
- Данс 13-ыг битүүмжлэн, захиран зарцуулах эрхийг нь хязгаарлажээ.
Авлигатай тэмцэх газрын Хэвлэл мэдээлэл, олон нийттэй харилцах ажилтан, комиссар Н.Тэмүүлэн “Иргэдэд хандаж нэг зүйлийг анхааруулмаар байна. Хөдлөх болон үл хөдлөх хөрөнгө худалдан авахдаа эх үүсвэр, бүртгэлийн маргаантай эсэх, аль нэг банкны барьцаанд байгаа эсэх эсвэл хуулийн байгууллагын хязгаарлалт тогтоосон эсэхийг нягталж байхыг анхааруулъя. Ингээгүй тохиолдол иргэд шүүхийн маргаантай үл хөдлөх хөрөнгийн асуудалд холбогдож, эд хөрөнгөөрөө хохирох вий гэдгийг сэрэмжлүүлж байна.
Жишээ нь, “Гантиг вилла” төслийн есөн блок Хөгжлийн банкны барьцаанд байгаа. Мөн дээрээс нь хуулийн байгууллагаас хязгаарлалт тогтоосон. “Гантиг вилла” хотхон нь УИХ-ын гишүүн асан Б.Ундармаагийн хамааралтай буюу нэгдмэл сонирхолтой этгээдийн компанийн барьж байгуулсан хөрөнгө юм” гэлээ.
Түүнчлэн Монголын говьд үйл ажиллагаа явуулдаг томоохон нүүрс олборлогч компанийн эзэн нь нэг настай монгол хүүхэд байсныг OCCRP (Organized Crime and Corruption Reporting Project) төслийн вэб сайтад мэдээлээд буй.
Энэ талаар АТГ-аас Хөгжлийн банкны асуудлаар мэдээлэл хийх үеэр тодруулахад Хэвлэл мэдээлэл, олон нийттэй харилцах ажилтан, комиссар Н.Тэмүүлэн "Нэг настай хүүхэд хуулийн этгээдтэй байна гэдэг бол цаана нь улс төрд нөлөө бүхий этгээд эсвэл албан тушаалтан байна уу гэдгийг сэжиглэж шалгах үндэслэл болно. Энэ хэргийг холбогдох хэлтэс шалгаж байгаа эсэхийг тодруулаад эргэн мэдээлэл өгье" гэх хариултыг өглөө.
