Оны эхний есөн сарын байдлаар Эрдэнэт үйлдвэрийн Барилга засварын цехийн хамт олон төлөвлөгөөгөө 107.5 хувьтай биелүүлж, 26 тэрбум төгрөгийн ажил гүйцэтгэн амжилттай ажиллаж байна. Энэ онд хийгдэх нийгмийн цехүүдийн барилгын засвар, бүтээн байгуулалтын ажлын гүйцэтгэл 90 хувьтай, үйлдвэрлэлийн үндсэн цехүүдийн хөрөнгө оруулалт, урсгал засвар 75 хувийн гүйцэтгэлтэй явна. Бүтээн байгуулалтын томоохон ажлаас дурдвал, “Строй инвест” компаниас Эрдэнэт үйлдвэрт шилжиж ирсэн Ерөнхий захиргааны III байрны их засварыг бүрэн дуусгаж хүлээлгэн өглөө. Бөхийн өргөө буюу Соёл, спортын “Эрдэнэт” цогцолборын барилгын ажил одоогоор 70 хувийн гүйцэтгэлтэй, гадна тохижилт, пасадны ажил хийгдэж байна. Нийгмийн чиглэлийн энэхүү бүтээн байгуулалт ирэх хавар үргэлжилнэ гэж Барилга засварын цехийн Ерөнхий инженер Ж.Батсуурь ярилаа. Тус цех энэ онд нийт 36 орчим тэрбум төгрөгийн төсөвт өртөгтэй ажил хийхээр төлөвлөснөөс одоогоор 70 орчим хувийн гүйцэтгэлтэй ажиллаж байна.