Монгол Улсын Засгийн газрын Шинэ сэргэлтийн бодлогын хүрээнд Алтанбулаг боомтыг олон улсын жишигт нийцүүлэн өргөтгөн шинэчлэх, хүчин чадлыг нэмэгдүүлэх төслийн бүтээн байгуулалтын ажлыг хэрэгжүүлж байна.
Азийн хөгжлийн банкны хөнгөлөлттэй зээлийн санхүүжилттэй тус төслийн хүрээнд боомт дээр зорчигч тээврийн 19, ачаа тээврийн 18, дэд бүтцийн 5 барилга байгууламж, иж бүрэн инженерийн шугам сүлжээ, 6000 м2 ногоон байгууламж, тусгаарлах зурвас бүхий 4 эгнээ 1,7 км урттай автозам, 7000м2 авто зогсоол, 30000 м2 зам талбай баригдана. Түүнчлэн орчин үеийн теле хяналтын систем, тээврийн хэрэгслийг автоматаар бүртгэх ухаалаг гарцууд болон өндөр хүчин чадал бүхий рентген төхөөрөмж суурилагдана.
Боомтын шинэчлэлийн үр дүнд Алтанбулаг боомтоор зорчигч нэвтрүүлэх хүчин чадал 3 дахин, ачааны болон суудлын тээврийн хэрэгсэл нэвтрүүлэх хүчин чадал 4 дахин нэмэгдэж, иргэд, аж ахуй нэгжүүд боомтоор түргэн шуурхай, ая тухтай үйлчлүүлэх боломж бүрдэнэ. Мөн Монгол Улсын гадаад худалдаа, эдийн засгийн хөгжилд томоохон нөлөө үзүүлнэ.